NIVÎSEKE QUZELKURT Û FILAN Û BÊVAN

Min got; belê, libê, mixabin, bibore, ewqas çêbû, “Sevil îdare lo! Û xayîn mo îflah. La axuyî, hade mo xerîb.” Bajoo! Eynik, neynik, tîtik û damarê çiriyayî, xwîna rijiyayî, dile şikestî û boş-belaş. Ev e ha! Bi sê qesem navê Xwedê¹ û bi Mishafa Reş ev e.

Te got, “Ev kî ye, kî ne qurban?” Wellehî ez jî nizanim. Bo nimûne, hey ne ew Rûstemê Zal e û bi Xwedayê li her deverî re û ne li tu deran ne yê Dostoyevskîye jî. Xenzîr û xenzîr in. Dijminê dost û hevalên xwe ne; dikirin û nafroşin, difroşin û nakirin. Edî ez jî nizanim go kî, kî ye.

Keko, bibore ez ji te fêhm nakim.

Bi sehwa Anunakiyê Sûmerî, bi hilma gurzê Ristemê Zal û li ser sonda Paltoyê N.Gogol tu ji min qenc fêhm dikî. Dîrok, jiyan, zindan, xizanî, zindiqî, feqîrî, berxwedan filan û bêvan! Heke ku dîsa jî te tiştek fêhm nekiribê quzelkurt ji tere û bin dilê te girt û tu pê nefilitê. Hema ji her hawê Jîyanêve kî ne dürüst be, ne dilxwaz be ewe û ewin.

Ma hîn tu qala demê û çand û hunere dikî?

Êrêêê, lîstikvan, şano, pêşandan, gelên perîşan, zimanê zêrevan, lê mixabin ji hebûna kurmê darê; bêxwedî, xemgîn, lê dewlemend; rewşenbîr, tebeşîr, mibaşîr, nexêrxwaz, tirsonek, fisek, sembusek. Wey xwelî li serê min be! Min jî digot qey ez ê hîn behsa Platon, W.Shakespeare, J.J.Rousseau filan û bêvanan bikim. Na wele, ev hêvî êdî pûç û vala ye. Ez ê niha bi lez rabim û bifirim cem Melayê Cîzîrî. Ez ê silaveke jidil û kezebê bidimê, rahijim dile wî yê zêrîn, himbêz bikim, texim nav pêsîra xwe,  paşê ez ê vegerim cem kezîzera xwe, çend maçan jê bidim û ez ê  bi silavên Melayê Cîzîrî, ên germik, nermik û hûrik jê re bibêjim,

“Şox û şengê zuhre rengê

Dil ji min bir,

dil ji min bir”

Gelo, kezî zer bûn?

 

 

 

_____________

¹ Bi sê qesem navê Xwedê: Ev sonda xiristiyanan(mesihîyan) e. Bav, kur û giyanê pîroz. Ji xwe ew bawer dikin ku Xweda ji sê qisiman pêk hatî ye. (Üçlü teslis: Baba, oğul ve kutsal ruh) Di kurdî de dema sond dixwin wi sa dibêjin “Bi sê qesem(qisim) navê Xwedê”